2026-йилги «Бир макон, бир йўл» Шенси провинсиясининг ўзига хос маҳсулотлари кўргазмасининг Марказий Осиё сессияси Ўзбекистонда бўлиб ўтди.
14–16-октабр кунлари Ўзбекистоннинг Тошкент шаҳрида 2026-йилги «Бир макон, бир йўл» Шенси маҳсулотлари кўргазмаси (Марказий Осиё сессияси) бўлиб ўтди. Мазкур тадбир Шенси провинсиясининг Халқаро савдони ривожлантириш қўмитаси томонидан мустақил равишда ташкил этилган хориждаги савдо-иқтисодий йўналишдаги бренд тадбири бўлиб, кетма-кет ўнинчи марта ўтказилмоқда. Тадбир географияси Марказий Осиё, Жануби-Шарқий Осиё, Европа ва Африканинг етти мамлакатини қамраб олади. Кўргазма Шенси провинсиясининг ташқи дунёга очиқлигини намойиш этиш ҳамда «Уч Қин» («Санқин») ҳудудига хос маҳсулотларни хорижий бозорларга экспорт қилишга кўмаклашиш учун муҳим платформага айланди. Корхоналарнинг кўргазмалардаги иштироки тобора ортиб бормоқда.
Жорий йилда Марказий Осиёга бағишланган махсус кўргазма Хитой Халқ Республикаси Давлат кенгаши маъқуллови билан Хитой Халқаро савдони ривожлантириш қўмитаси томонидан ташкил этилган «Хитой — Марказий Осиё» миллий хорижий савдо-иқтисодий кўргазмаси таркибига киритилди. Ушбу юқори даражадаги платформага таянган ҳолда, Шенси провинсиясининг Халқаро савдони ривожлантириш қўмитаси Тошкентдаги кўргазмада 10 та корхона ва 20 нафардан ортиқ вакилларнинг иштирокини таъминлади. Кўргазма майдони қарийб 100 квадрат метрни ташкил этди.
Кўргазма Шенси провинсиясининг маиший ва қурилиш материаллари, тиббий ускуналар, электромеханик жиҳозлар ҳамда бошқа рақобатбардош маҳсулотларини тарғиб қилиш, корхоналарга Ўзбекистон ва Марказий Осиё бозорлари билан алоқалар ўрнатишда ёрдам бериш ҳамда экспорт имкониятларини очиш мақсадида ташкил этилди.
Шу билан бирга, кўргазма доирасида «Шенси корхоналари — Ўзбекистонда» номли ҳамкорлик учрашуви ва бизнес музокаралари ҳам ўтказилди. Учрашув икки асосий қисмдан иборат бўлди: жамоавий шартнома имзолаш маросими ва бизнес музокаралари.
Учрашув якунида самарали натижаларга эришилди: Шенси провинсиясидаги тиббиёт муассасаси Ўзбекистон ташкилоти билан ҳамкорлик меморандуми имзолади, «Янлин Гуоҳе» компанияси қишлоқ хўжалиги соҳасидаги ҳамкорлик лойиҳасини амалга ошириш бўйича келишувга эришди, Шенсининг «Ҳезҳонг Мумен» компанияси эса маҳаллий дистрибютор билан маҳсулот сотиш шартномасини тузди.
Тадбир давомида Шенси провинсиясининг рақобатбардош тармоқлари ва инвестициявий муҳити ҳам тақдим этилди. Иштирокчи корхоналарнинг маҳсулотлари ва ҳамкорликка бўлган эҳтиёжлари ҳақида маълумотлар эълон қилиниб, шундан сўнг мақсадли индивидуал бизнес музокаралари ташкил этилди. Тадбирда жами 80 нафарга яқин Хитой ва хорижий вакиллар иштирок этди.
Хитой кўп йиллардан буён Ўзбекистоннинг энг йирик савдо ҳамкори бўлиб қолмоқда. Хитой божхона статистикаси маълумотларига кўра, 2025-йилда Хитой ва Ўзбекистон ўртасидаги ўзаро савдо ҳажми 16,1 миллиард АҚШ долларига етиб, ўтган йилнинг шу даврига нисбатан 17,9 фоизга ошган. Ўзбекистон Республикаси Давлат статистика қўмитаси маълумотларига кўра эса, шу йили Ўзбекистон ва Хитой ўртасидаги савдо ҳажми 17,214 миллиард АҚШ долларини ташкил этган.
Ҳозирги вақтда Ўзбекистон саноатни трансформация қилиш ва модернизациялаш жараёнларини жадаллаштирмоқда. Иқтисодиёт ресурсларга қарамликдан диверсификациялашган инновацион ривожланиш моделига ўтмоқда, бозор салоҳияти эса тобора кенг очилмоқда. Корхоналарни кўргазмаларда иштирок этиш ва ҳамкорлик алоқаларини ўрнатиш учун Ўзбекистонга олиб келиш, Шенси провинсияси ва Ўзбекистон корхоналари ҳамда муассасалари ўртасидаги алоқаларни чуқурлаштириш нафақат Шенси маҳсулотлари брендининг маҳаллий бозордаги таъсирини оширишга хизмат қилади, балки Шенси провинсиясининг «Бир макон, бир йўл» ташаббусини биргаликда амалга оширишни изчил илгари суриш борасидаги амалий қадамидир.
2027-йилда Шенси провинсияси хориждаги савдо-иқтисодий фаолиятини янада чуқурлаштиришда давом этади. «Бир макон, бир йўл» Шенси маҳсулотлари кўргазмасини мунтазам ўтказиш, корхоналарни халқаро миқёсдаги нуфузли ихтисослаштирилган кўргазмаларда иштирок этишга жалб қилиш ва хорижий бозорларга чиқиш каналларини кенгайтириш режалаштирилган. Шунингдек, «Шенсида ишлаб чиқарилган» ва «Шенсида яратилган» маҳсулотларнинг янада кўпроқ қисмини жаҳон бозорига олиб чиқишга кўмаклашиш ҳамда «Бир макон, бир йўл» ташаббусини биргаликда амалга ошириш доирасида юқори сифатли ривожланишга Шенсининг савдо-иқтисодий салоҳияти орқали янги туртки бериш кўзда тутилган.
ССП матбуот хизмати